16-мĕш хут иртрĕ  турнир

Пăкăянти пĕтĕмĕшле пĕлу паракан тĕп шкулта Пĕтĕм тĕнчери хĕрарăмсен кунĕ тĕлне волейбол турнирĕ ирттересси йăлана кĕнĕ. Шăп уяв кунĕнче Пăкăян каччи Сергей Судаков Чечен вăрçинче пуçне хунă. Паттăр салтака асăнса районти волейболистсем кашни çулах унăн тăван шкулĕнче асăну турнирĕ ирттереççĕ.

Асăну митингĕнче Киров ял администрацийĕн пуçлăхĕ Г.П.Егоров, Пăкăян шкулĕн директорĕ Л.В.Григорьева, «Кирова» агрофирма ертÿçи А.С.Яндутов, Киров лесничествин тĕп лесничийĕ, турнирăн тĕп судйи  В.Н.Мосолов сăмах илчĕç. Шкулти тавра пĕлÿ музейĕн активĕн членĕ, 8-мĕш класра вĕренекен Наташа Ефимова пухăннисене Сергей Судаковăн пурнăçĕ çинчен хатĕрленĕ презентаципе паллаштарчĕ. Ял çамрăкĕсем шкул стени çинчи Асăну хăми патне чечексем хучĕç. Сергея асăнса пурте пĕр минут шăп тăчĕç. Пĕлтĕрхи çĕнтерÿçĕ - «Ветеран» командăн капитанĕ В.В.Соболев турнир ялавне çĕклерĕ.

Питĕ хĕрÿ иртрĕ спорт тупăшăвĕ. Командăсем пĕринчен тепри ăста вылярĕç. Темиçешер очко кăна уйăрса тăчĕ выляса илекенсемпе выляса яракансене. Йĕпреçри «Водоканал» команда (капитанĕ – Раиса Степанова) Пăкăян хĕрĕсен волейболисткисене (капитанĕ – Светлана Иванова) парăнтарчĕ. Çĕнтерÿçĕсен командинче Йĕпреçре пурăнакан Пăкăян хĕрĕсем те пулни пĕрре кулянтарать (хамăрăннисене хирĕç вылярĕç-çке), тепре савăнтарать (хамăрăннисемех çĕнтерчĕç-çке!). Арçынсем 5 командăпа тупăшрĕç. Киров ял администрацийĕн команди (капитанĕ – Г.П.Егоров) тата Пăкăян çамрăкĕсен команди (капитанĕ – Г.Д.Андреев) паттăр ентешĕн чысне хÿтĕлесе мĕн пур ăсталăхне, тăрăшулăхне, вăйне хучĕç, çапах кăçал ăнăçу вĕсен енче пулмарĕ. «Тепĕр çул çĕнтереççех!» - терĕç  ăмăртăва сăнакан хамăр ял çыннисем.

Ирçе Çармăсран килнĕ команда (капитанĕ – А.Г.Яруков) виççĕмĕш вырăн йышăнчĕ, иккĕмĕш вырăнта – Йĕпреçри «Ветеран» команда (капитанĕ – В.В.Соболев). Турнирăн куçса çÿрекен кубокне кăçал шалти ĕçсен пайĕн «Динамо» команди (капитанĕ – А.Л.Максимов) çĕнсе илчĕ. Арçынсен çĕнтерÿçĕ командинче те хамăр ял шкулĕнче вăтам пĕлÿ илнĕ Алексей Михайлов пулни кăмăла çĕклет. Турнирти «Чи аслă волейболист» ята Василий Соболев тивĕçрĕ, «Чи çамрăк   волейболист» ята – Пăкăян каччи Андрей Ермеев.

Яланхи пекех, шкул музейĕнче упранакан  сăн ÿкерчĕксем, документсем, салтак çырăвĕсем С.Судаковăн 21 çултах татăлнă пурнăçĕпе паллаштарчĕç. Иртнĕ уйăхра Интернетра пирĕн шкул музейĕн сайчĕ те ĕçлеме пуçларĕ. Хамăр  тăрăхри паллă çынсемпе паллаштаракан страницăра паттăр салтак çинчен те вуласа пĕлме пулать.

В.Н.Руссков, С.А.Сергеев, Г.П.Егоров, В.И.Шуркин, А.С.Яндутов, В.Н.Мосолов, Ан.Н.Костантинов, Ю.Н.Руссков, Ал.Н.Константинов, шкулта ĕçлекенсем яланхи спонсорсем пулса турнира ирттерме пулăшрĕç.

А.Терентьева, шкулти тавра пĕлÿ музейĕн ертÿçи.