Чăваш чĕлхипе литературине вĕрентекенсен районти ассоциацийĕн черетлĕ семинарĕ «ФГОСпа килĕшÿллĕн урок ирттересси тата класс тулашĕнчи ĕçсене йĕркелесси» темăпа иртрĕ.
Районти вĕрентекенсем Пăкăянти пĕтĕмĕшле пĕлÿ паракан тĕп шкула пухăнчĕç. Чи малтанах Юлия Владимировна Соловьёва вĕрентекен 7-мĕш класра чăваш чĕлхипе «Хушу наклоненийĕнчи глаголсене тĕрĕс çырасси» темăпа интереслĕ урок ирттерчĕ. Анфиса Николаевна Иванова 2-6 - мĕш класра вĕренекенсемпе «Буратино уйăх çине вĕçет» спектакль хатĕрленĕ. Çамрăк артистсем выляни те хăнасене питĕ килĕшрĕ. Районти тĕрлĕ шкулсенчен килнĕ вĕрентекенсем шкул музейĕнчи экспонатсемпе те хаваспах паллашрĕç.