Нарăс уйăхĕн 21-мĕшĕнче Эйпеçри пĕтĕмĕшле пĕлÿ паракан вăтам шкулта чăваш чĕлхипе литература вĕрентекенĕсен «Чăваш чĕлхипе литератури. Уçă урок – тата класс тулашĕнчи чи лайăх ĕç» район шайĕнчи 6 фестивалĕ иртрĕ.  Фестиваль Пĕтĕм тĕнчери тăван чĕлхесен кунне паллă тунипе тÿр килчĕ.

     Фестивале уçнă май район администрацийĕн вĕрнтÿ пайĕн методисчĕ Алевтина Александровна Игнатьева пухăннисене тăван чĕлхесен кунĕ ячĕпе саламларĕ. Кашни халăхăн хăйĕн тăван чĕлхи пур. Чăвашсен вăл – ĕмĕрсем хушши упранса юлнă çепĕç чĕлхемĕр - чăваш чĕлхи, чĕкеç чĕлхиллĕ сăмахăмăр. Тăван чĕлхе атте-анне чĕлхи пулнине, ăна манма юраманнине палăртрĕ вăл.

     Çак шкулта чăваш чĕлхипе литературине вĕрентекен Луиза Петровна Школьникова Пĕтĕм тĕнчери тăван чĕлхе кунне  халалланă «Упрар тăван чĕлхемĕре» класс тулашĕнчи  уçă мероприяти (музыкăпа литература композицийĕ)  кăтартрĕ. Мероприятие  5,6,8,10-мĕш классем хутшăнчĕç. Вĕренекенсем чăваш чĕлхине халалланă сăвăсем вуларĕç, юрăсем юрласа куракансене тыткăнларĕç, чăваш халăхне çутта кăларакан И.Я.Яковлева тата Театр çулталăкне халалласа  Тихăн Петĕрккин «Çутталла» пьесин пĕр пайне лартса пачĕç.  Юлашкинчен пурте пĕрле «Илемлĕ, илемлĕ…» чăваш халăх юррине юрларĕç.

     Малалла фестивале килнисем уçă уроксем итлерĕç. Фестивале хутшăннă вĕрентекенсем Надежда Алексеевна Евдокимова, Юлия Васильевна Кошелева, Ираида Николаевна Иванова Алена Андреевна Ядрицова, Людмила Николаевна Клементьева Тăван чĕлхесен кунне  тата Театр çулталăкне халалланă уçă уроксем ирттерчĕç, ку таранччен пухнă методикăри ĕç опычĕпе паллаштарчĕç.

     Пултаруллă вĕрентекенсем дипломсене тивĕçрĕç.